Vastelaovesvereiniging "De Windjbuujels" Ruiver

VVDW

Prins ….. I of II of III of ….

Zoeë ‘t lètste “anomieme” prins-weekend is achter de rök. Nag minder as ein waek, den moog ich mich eindelik offiesjeel Prins van de Windjbuujels neume. Ich draag dit geheim den al 10 waeke en 5 daag bie mich.  Toen haet de Peekaa mich gevraog om uch veur te gaon as Prins .…. I of II of III of …  Nao ruum 9 waeke is ‘t bienao zoever. Same mèt mien adjes, Prins Sjors II, Bacchus Djen (proficiat veur dich en dien Bacchusklöp) en de nag oet te rope Jeugprins van Jong Nederland, ‘t jeugboerebroedsjpaar en ‘t Boerebroedsjpaar zalle veur d’r dit jaor same met uch allemaol eine “neet te filme” Vastelaovend van gaon make.

Maar ieërs höb ich nag effe undercover genaote mien lètste “vrieje” weekend mèt de familie. Lekker same mèt de kids ein sjnieëpop gemaak en gesjleit euver de Ruiver. “s-Aoves waas d’r weer ein sjoeën zitting. Veural ós eige ruiverse artieste vónj ich geweldig. Chapeau. Ouch höb ich dit weekend Prins Sjors ein handj gegaeve oppe receptie en ‘m van herte proficiat gewins.

Aafgeloupe waek zien veur begós met de veurbereidinge en ‘t knutsele veur de optoch. Allein weite die angere neet det ich d’r den neet bie bön. Ich waas d’r ouch hielemaol neet bie mèt miene kop. Zólle ze ech nag nieks in de gate höbbe?

Effe ein reactie op de vraog van Wieniewaagt oet ‘t Gastebook: veur bringe allein pos róndj in de körstied of as d’r ‘ne breef verkierd bezorg waert.

Veur zeen ós sjnel.

De groete,

Spielberg