Vastelaovesvereiniging "De Windjbuujels" Ruiver

VVDW

ALGEMEIN REGELEMENT WINDJBUUJELOPTOCHTE

Deilnimme is meugelik in de categorie Einlinge & Duo’s, Joekskepelle, Kleine groepe (2 t/m 8 pers.), Groeëte groepe en Praalwages.

Opsjtelle deent te gebeure op vastelaovesmaondig vanaaf 12:30 oer oppe kKulsewaeg. De nummer lets begint met opsjtelle vanaaf dekruutsing Keulswaeg-Theresiasjtraot-Beukelsjtraot; vanoet dao aafloupend toet nummer 1 euver de Keulsewaeg toet ongevieër de Beatrixsjtraot. De Prinsewages mèt aanhang, muziekgezelsjappe en de Boerebroelof sjtaon bie ’t kerkplein van Offebék en nimme dao defilé aaf. De roete geit verder de Keulsewaeg aaf, Riekswaeg en den nao ‘t Raodhoesplein. Veur ’t gemeinthoes sjtop d’n optoch.

Zjurie
Idderein dae gezjureerd wilt waere en dus in de prieze wilt valle, waert verzóch via de Keulsewaeg nao de opsjtelplaats te kómme, angers waert geur néét gezjureerd. Tösse de st. Annasjtraot en de st. Theresiasjtraot sjteit de zjurie óm de ieërste indrök van uch idee en oetveuring op papier te zètte.
Geur mót uch dao melle tösse 12:30 en 13:15 oer. Geur kènt de zjurie hie uch óngerwerp dudelik make (moog ouch sjriftelik). Daonao kènt geur verder trekke richting opsjtelplaats oppe Keulsewaeg.
Alle groeëte praalwages sjtelle zich op oppe Keulsewaeg. Hie waere se den ouch gezjureerd.
De zjurie bekiek ’t gehieël nag ens in d’n optoch. Hie nao probere zie de punte en prieze klaor te höbbe as de prinsewage oppe merret aan kump.

Optochreglement

1. Idderein dae gezjureerd wilt waere en dus eine pries wilt winne is verplich via de Keulsewaeg te gaon, wao de zjurie sjteit. De prinsewage sjluut de optoch aaf, idderein dae nao de prinsewage binnekump waerd neet in de oetsjlaag opgenaome. Dit geld veur de groeëte optoch. Bie de Kinjeroptoch waere de groepe gezjureerd bie de opsjtelling.
2. ‘t Sjtruije van confetti en sjnoep moog. ’t Sjtruije en sjmieëte van anger gerei, waodoor gevaor of sjaaj aan toesjouwers en/of eigendomme van toesjouwers óntsjteit, is verbaoje.
Wannier d’r gesjtruid wuuërt vanaaf de wages mótte d’r begeleiders langs de wages loupe.
3. Knalapparate en ’t gebroeëk van anger apparate, die sjaaj kènne aanbringe aan de volksgezóndjheid zien néét toegesjtaon.
4. Vuurwerk is néét toegesjtaon.
5. ’t Verbranje van aafvalsjtoffe, wao door hinjerlik en/of sjaajlikke rouk of gaas vrie kump, is néét toegesjtaon.
6. ’t Meitrekke van bieëste (neet ziende trekpaerd) is néét toegesjtaon. Allein wannier ’n bieës zo bepaolend is veur ’t óngerwerp, kèn dit bie insjrieving kenbaar gemaak waere, de optochkemissie bepaold of ’t bieës waal of neet mei moog trekke. Meitrekke van aafval van bieëste of organe is néét toegesjtaon.
7. Bie ’t gebroëk van zedekwetsende aafbeeldinge, veursjtellinge of opsjrifte, ouch as dit ein racistisch of discrimminerend karakter haet of as get kwetsend is veur ein of mier persoeëne, dit ter be-oerdeiling van de optochkemissie, is deilname aan de optoch oetgesjlaote!
8. ’t Gebroeke of meiveure van waopes is verbaoje ingevolge de “wapenwet”.
9. Eise Voertuige:
1. Op of bie de wages moge gèn verpakkinge mèt brandjbare vloeistoffe aanwezig zien en d’r moog op gèn inkele manier aope vuur waere meigeveurd in de optoch.
2. Idder “voertuig” en aanhenger die deilnimme aan de optoch mótte in degelikke sjtaot en konsjtruksie verkiere en mótte waere besjtuurd door eine dao toe bevoegde persoeën. Ouch deent ‘t “voertuig” ein geldige “WA-verzekering” te höbbe ingevolge de “wegenverkeerswet” en de “Wet Aansprakelijkheidsverzekering Motorrijtuigen”. De eigenaere c.q. hajers dene veuraaf bie häör verzekeringsmaatsjappie te informere of zie tiedes ’t deilnimme meè ’n voertuig/ aanhenger aan ‘nne optoch taege wettelike aansjpraokelikheid verzekerd zien. Bie insjrieving bewies euverlègke.
3. Op iddere wage mót ‘ne (goodgekeurde) poejerblusser met ‘ne inhoud van teminste 6 kilogram aanwezig zien.
4. Toegesjtaone aafmetinge van de voertuige:
– voertuige moge neet hoeëger zien den 6 ½ maeter.
– voertuige moge neet breijer zien den 3 maeter.
– As d’r zich miense op ’n voertuig c.q. wage bevinje deent d’r ’n deugdelike afzetting te zien van 1.20 maeter die nagelvas mót zien.
– Bie slech zich dene de voertuige aan de veur- en achterkantj veur- en achterverleechting te höbbe.
5. Alle voertuige mótte rondjóm waere aafgesjermp toet op ’n huuëgte van 20 cm. van ’t waegdek, de meigeveurde aggregate dene op ’n deugdelike wieze bevestigd te zien. Oëtgezónjerd ‘t trekkend voertuig.
10. ’t Sjprik veur zich det tiedes de optoch alcohol en verkieër neet same gaon. Gebeurt dit toch zal(le) de deilnimmer(s) oetgesjlaote waere van (verdere) deilname aan de optoch.
11. Veur de toekenning van subsidie veur praalwages waert verweze nao ’t subsidiereglement, te verkriege bie de optochkemissie.
12. Idderein nimp deil op eige risico. V.V. “De Windjbuujels” aanvaardt gèn inkele aansjpraokelikheid veur sjaaj of wat den ouch, óntsjtaon veur, tiedes of nao de optoch door of aan deilnimmers en/of publiek.
13. Idderein dae zich opgeuf verklaort zich door akseptasie van dit reglement akkoord met de regels, zoëwie in dit reglement zien opgesjteld.
14. In alle gevalle, wao dit reglement néét in veurzuut, besjlis de optochkemissie. Daegene dae zich neet aan de regels hèlt, löp ’t risico det d’r oëtgesjlaote waert van deilname.

Veur raekene d’r op det idderein verantjwaord mei duit en winse uch väöl sjpas en plezeer!!!
De optochkemissie groeëte optoch:

Hans Boonen Rob Hillekens
Leon Linssen Johan Straatman
Twan Bongers

email: Optoch@windjbuujels.nl

 




HOESHAAJELIK REGLEMENT

VASTELAOVESVEREINIGING “DE WINDJBUUJELS”, RUIVER

vasgesjtèld op 27-9-1974
lètstelik gewiezig op 26 november 2010

LIDMAATSJAP
art. 1 : Oppe ieërsvolgende besjtuursvergadering nao de aanmelding van ‘n niej lid wuuërt euver de toelaoting besjlis. Van dees besjlissing wuuërt binne driej waeke mètdeiling aan de kandidaat gedaon. ‘n Aafwiezende besjlissing van ‘t besjtuur môt gemotiveerd plaatsvinje. Betrokkene haet ‘t rech binne ‘nne termien van driej maondj taege dees besjlissing sjriftelik in beroop te gaon biej de algemeine lejevergadering die oeteindelik zal besjlisse.

art. 2 : Gewuuëne leje, iereleje en leje van verdeenste höbbe ‘t rech óm ‘n sjtum oet te bringe oppe algemeine lejevergadering. Artikel 6 Sjtatute. Leje ónger de 18 jaor sjtumme via eure wettelik vertaegewoordiger; dees sjtum geldt as ein halve sjtum.

art. 3 : ‘t Lidmaatsjap is binjend veur ‘t loupende vereinigingsjaor.

art. 4 : Opzègking, as bedoeld in art. 8 ónger 1 van de Sjtatute, deent per aangeteikend sjrieve aan ‘t besjtuur te gebeure. Biej opzègking van ‘t lidmaatsjap blief me de kontribusie veur ‘t loupend vereinigingsjaor versjöldig.

art. 5 : ‘t Besjtuur zal ‘n lid kènne sjorse en/of veurdraage veur royement biej geval van :
1 – wanbetaling
2 – misdraging

art. 6 : Van wanbetaling is sjpraoke as ‘n lid, nao ‘n aanmaning van ‘t besjtuur as ómsjreve in art. 14 van dit reglement, in gebreke blief ziene kontribusie euver einig jaor te voldoon. Ónger misdraging wuuërt versjtaon ‘t in gevaor bringe of aantaste van de goeje naam van de vereiniging of ‘t op anger meneer benaodeile van de vereiniging, doordet mètwerking wuuërt verlind of aktiviteite waere óntploeid, ofwaal allein ofwaal in groepsverbandj die toet doel höbbe ‘t belang van derde te sjteune, dit nao beoerdeiling van ‘t besjtuur.

art. 7 : Zólang de sjorsing door ‘t besjtuur neet is opgeheve kènne de lidmaatsjapsrechte neet waere oetgeoefend.

art.8 : De algemeine lejevergadering kint op veurdrag van ’t besjtuur ein lid royeere. Veurdet de algemeine lejevergadering ein besjloet nump, sjtelt zie ’t betreffend lid in de gelaegeheid um ter vergadering ’t woord te veure.

art. 9 : Ein lid, det door de algemeine lejevergadering is geroyeerd verluus ónmiddellik alle rechte oet ‘t lidmaatsjap veurtvloeiende. Hae/ziej is aevel waal gehaaje alle verplichtinge, woe-aan nag
neet waerde voldaon, nao te kómme.

art. 10 : Behalve wannieër sjpraoke is van wanbetaling sjtèlt ‘t besjtuur ‘t betrokke lid direk sjriftelik in kènnis van häör besjloet toet sjorsing of royementsveurdrag.

KONTRIBUSIE
art. 11 : ‘t Bedraag van de kontribusie wuuërt door de algemeine lejevergadering bepaold. De betaling van de vasgesjtèlde kontribusie deent veur ‘t ganse jaor inèns biej veuroetbetaling biej de penningmeister te gebeure en waal oeterlik 1 mei van ‘t nieje vereinigingsjaor.

art. 12 : As nao ‘t versjtrieke van baovegeneumde termien gèn betaling haet plaatsgevónje haet ‘t besjtuur ‘t rech ‘t betrokke lid sjriftelik toet betaling aan te mane. Moog binne 3 waeke nao dees sjriftelikke aanmaning nag gèn kontribusie zien betaald, den haet ‘t besjtuur ‘t rech, euvereinkómstig de bepalinge in art. 8 lid 4 van de Sjtatute en art. 8 van dit reglement, ‘t betrokke lid te sjorse.

BESJTUUR
art. 13 : ‘t Besjtuur zal besjtaon oet : eine veurzitter, eine vice-veurzitter, eine sikkretaris, eine penningmeister en huuëgstes 9 leje. De veurzitter wuuërt door de algemeine lejevergadering biej aafzónjerlikke sjtumming
gekaoze; daonao de euverige besjtuursleje die de fungsies óngerling verdeile. De fungsie van sikkretaris en penningmeister kèn in eine persoeën waere vereinig. Ouch kèn dees fungsie waere waargenaome door ‘nne adminisjtrateur. Deze haet as zódanig gèn sjtumrech inzake besjtuurszake.

art. 14 : De besjtuursleje waere gekaoze veur de duur van 3 jaor, mèt de bepaoling det:
– d’r idder jaor volges ein door ’t besjtuur vasgesjteld ruëster van aaftraeje tenminste 2 en huuëgstes 3 besjtuursleje aaftraejend zien
– de veurzitter en de sikkretaris neet in ‘t zelfde jaor aaftraejend zien.

art. 15 : Biej verkeezing van ‘n tössetiedse vakature traejt de gekaozene aaf op ‘t tiedsjtip woe-op daegene in waem zien plaats hae/ziej is gekaoze haaj mótte aaftraeje.

art. 16 : Aaftraejende besjtuursleje zien direk herkeesbaar.

art. 17 : Kandidaatsjtèlling van besjtuursleje kèn gebeure door :
– ‘t besjtuur
– op zien mins 5 leje, woevan de naam neet oppe kandidaatslies veurkump en mèt de bepaoling det ‘n lid maar eine kandidaat kèn sjtèlle.

art. 18 : De kandidaatsjtèlling door leje mót minstes 3 daag veur de vergadering woe-in de verkeezing plaats zal höbbe sjriftelik biej de fungsionerende sikkretaris zien ingedeend.

art. 19 : In tössetiedse vakatures kèn waere veurzeen as ‘t besjtuur of de algemeine lejevergadering det nuuëdig ach.

TAAK VAN ‘T BESJTUUR
art. 20 : ‘t Besjtuur waak euver de juuste naolaeving van de Sjtatute en ‘t hoeshaajelik reglement.

art. 21 : ‘t Besjtuur haet toet taak de vereinigingsbelange, binne de kringk van häör bevoegheje, in zien ganse ómvang te behertige.

art. 22 : ‘t Besjtuur kèn zich laote doon biejsjtaon door ein of mieër kemissies.

art. 23 : ‘t Besjtuur sjtèlt de agenda same van de algemeine lejevergadering. De leje zien bevoeg ein of mieër punte oppe agenda te doon plaatse, mits minstes 3 daag veur de datum van de bedoelde vergadering biej de zittende sikkretaris ingedeend en óngersjteund door minstes 5 leje. Dit agendapunt of dees agendapunte zal(le) as aanvullend(e) punt(e) in de vergadering behanjeld waere.

art. 24 : ‘t Dageliks besjtuur van de vereiniging wuuërt gevormp door de veurzitter, de sikkretaris en de penningmeister. Veurzówiet de sikkretaris en de penningmeister sjlechs ‘n advizerende sjtum höbbe wuuërt ‘t dageliks besjtuur aangevuld mèt ‘n lid, aan te wieze oet en door ‘t besjtuur.

art. 25 : In sjpoedeisende gevalle kèn ‘t dageliks besjtuur besjlissinge nimme, maar ‘t mót zich in de ieërsvolgende besjtuursvergadering verantjwaorde.

DE VEURZITTER
art. 26 : De veurzitter geuf leiding aan en hèlt toezich op ‘t vereinigingslaeve. Hae is de offisjele waordveurder van de vereiniging. Hae leit de vergaderinge en sjtèlt daoin de orde van de daag vas, mèt die bepaoling det de algemeine lejevergadering ‘t rech haet daoin wieziginge aan de bringe. Hae haet ‘t rech óm beraodsjlaginge te doon eindige as hae mènt det de vergadering voldoende is ingelich maar is verplich dees weer te doon hervatte as ein-derde van de oppe vergadering aanwezige leje ‘t verlange daotoe kènbaar maak. Hae sjtèlt de data van de besjtuursvergaderinge vas. Hae is daotoe verplich as 3 besjtuursleje
det winse en waal binne de door dees 3 besjtuursleje gewinsde termien.

DE SIKKRETARIS
art. 27 : De sikkretaris veurt de administrasie van de vereiniging veur zówiet dees neet is opgedrage aan angere. Hae is belas mèt ‘t notulere van de vergaderinge. Alle oetgaonde sjtökke van ‘t sikkretariaat waere names de vereiniging door um geteikend. Hae is verplich van dees sjtökker aafsjrifte te haaje. Hae hèlt ‘n lejelies of -register biej woe-oet de aard van ilk lidmaatsjap deent de blieke.
‘t Archief van de vereiniging wuuërt door um zorgvuldig bewaard en blief altied in eigendom van de vereiniging.

DE PENNINGMEISTER
art. 28 : De penningmeister behiert de geldmiddele van de vereiniging. Veur zien behier is hae persuuënlik verantjwaordelik. Hae dreug zorg veur de inning van de kontribusies en biejdrages en waal zódanig det de bate en sjölde direk waere gekènd. Betalinge oet de kas waere door um neet gedaon den taege behuuërlikke kwitansie. Gelde die neet nuuëdig zien veur de besjtriejing van de loupende oetgaves waere door um belag
euvereinkómstig door ‘t besjtuur te sjtèlle regels. Oppe algemeine lejevergadering bringk hae versjlaag oet euver zien behier. De penningmeister wuuërt veur zien behier gedechargeerd biej besjloet van de algemeine
lejevergadering. Hae is gehaaje aan de kaskemissie inzage te gaeve van de kas en alle beuk en besjeije en ouch euveriges alle inlichtinge te versjtrekke wèlke de kemissie terzake zien behier moog
verlange. Gelieke verplichtinge besjtaon veur um taegeneuver ‘t besjtuur det um op ilk moment ter verantjwaording kèn rope.

DE VORS
art. 29: De algemeine lejevergadering kèn besjloete toet ‘t aansjtèlle van ‘nne vors. De vors wuuërt door en oet ‘t besjtuur gekaoze. Hae is de veurgenger en sjpraekbuus van de vereiniging biej Vastelaovesaktiviteite.

DE PRIZZEDENT
art. 30: De prizzedent van de raod van 11 wuuërt beneump door ’t besjtuur. Hae is saame met de vors verantjwaordelik veur ‘t optraeje van de raod van 11 biej Vastelaovesaktiviteite. Hae maak de programma’s veur die aktiviteite en ligk dees veur goodkeuring veur aan ‘t besjtuur. De diverse kemissies bezorge ‘n programma, en eventuele wieziginge dao-in, van de ónger häör verantjwaordelikheid vallende aktiviteite woebiej ‘n rol is weggelag veur de raod van 11 ruum van teveure biej de prizzedent. De prizzedent en de vors kènne gezamelik ‘n lid van de raod van 11 sjorse as daotoe aanleijing besjteit. Dees sjorsing wuuërt veur toetsing veurgelag aan ‘t besjtuur oppe ieërsvolgende besjtuursvergadering. De prizzedent maak deil oet van de raod van 11.

RAOD VAN 11
art. 31 : Leje van de raod van 11 waere beneump door ‘t besjtuur op veurdrag van de vors en de prizzedent, de leje van de raod van 11 gehuuërd. Leje van de raod van 11 mótte lid zien van de vereiniging.
Wieziginge en/of aanvullinge in de raod van 11 kènne sjlechs gebeure door ‘t besjtuur op veurdrag van de vors en de prizzedent, de leje van de raod van 11 gehuuërd. De seremoniemeister wuuërt door ‘t besjtuur op veurdrag van de raod van 11 beneump. Ingeval van óntbraeke van einige veurdrach door de raod van 11 haet ‘t besjtuur zelf ‘t rech in de vakature te veurzeen. Eventuele angere fungsies binne de raod van 11 zalle nao bès vermoge waere verdeild en ingevuld.

art. 32 : ‘t Hoeëgste gezag in de vereiniging wuuërt oetgeoefend door de algemeine lejevergadering.

art. 33 : De algemeine lejevergadering zal binnne twieje maondj nao aafloup van ‘t vereinigingsjaor gehaaje mótte waere.

art. 34 : De agenda van de algemeine lejevergadering mót minstes inhaaje:
– de notule van de vurrige vergadering
– ‘t jaorversjlaag van de penningmeister
– ‘t versjlaag van de kaskemissie
– ‘t jaorversjlaag van de sikkretaris
– besjtuursverkeezing
– aanwiezing nieje kaskemissie, die oet 3 leje besjteit

art. 35 : Veursjtèlle en amendemente op veursjtèlle kènne zówaal door ‘t besjtuur as door de leje sjtaonde de vergadering waere ingedeend.

art. 36 : De oproop van ‘n vergadering mót minstes 8 daag veur die vergadering in ‘t bezit zien van de leje. De oproop vermelt boete de te behanjele óngerwerpe de plaats en ‘t tiedsjtip van de vergadering.

DE KASKEMISSIE
art. 37 : Oppe algemeine lejevergadering wuuërt door de leje ‘n kaskemissie aangeweze, die tiedes ‘t kómmende vereinigingsjaor, zoë dök as ze dit nuuëdig ach, aevel minstes eine kieër per jaor, de kas, beuk, besjeije en eigendómme, veurkómmende oppe lies van eigendomme, kontrolleert. Van häör bevinjinge geuf ziej kènnis aan ‘t besjtuur door ‘n sjriftelik rapport, oet te bringe binne 14 daag nao de kontrolle. De létste kontrolle mót plaats höbbe drek nao ‘t eind van ‘t vereingingsjaor. Oppe ieërsvolgende algemeine lejevergadering waere de rapporte ter kènnis gebrach van de vergadering, teneinde de penningmeister en de behieërders van de eigendómme te
dechargere. De kaskemissie is bevoeg aan ‘t besjtuur veursjtélle te doon euver ‘t te volge financieële beleid. Me kint huuëgstes veur de deur van 3 jaor tot lid van de kaskemissie waere beneump.
Eeder jaor traejt tenminste 1 lid van de kaskemissie aaf.
ALGEMEINE BEPAOLINGE
art. 38 : ‘t Besjtuur haet ‘t rech door leje in ‘t belang van de vereiniging gemaakde ónkoste te vergoede oet de vereinigingskas.

art. 39 : Idder lid is verplich de ónger zien behieër ziende eigendómme van de vereiniging zorgvuldig te óngerhaaje en te behieëre en dees oppe ieërste vordering van ‘t besjtuur of häör gemachtigde toet häör besjikking te sjtélle of te tuuëne.

art. 40 : In gevalle woë-in dit reglement neet veurzuut besjlis ‘t besjtuur. De algemeine lejevergadering is altied bevoeg ‘n dergelik besjloet te wiezige of boete werking te sjtélle. Hiejveur zien nuuëdig 2/3 van de oetgebrachde geldige sjtumme.

art. 41 : Idder lid wuuërt geach de bepaolinge van sjtatute en hoeshaajelik reglement en alle verdere wéttig bekénd gemaakde regels en bepaolinge te kénne. art. 42 : Idder lid krieg biej toetraejing van de sikkretaris ‘n eksemplaar van de bepaolinge van dit reglement.

art. 43 : De algemeine lejevergadering kèn dispensasie verlieëne van de bepaolinge van dit reglement, mits neet in sjtried mèt de sjtatute, in die gevalle woë-in ‘n gekwallificeerde mieëërderheid wuuërt vereis.

art. 44 : Wieziginge in dit reglement kènne allein waere aangebrach op ‘n daotoe biejeingerope algemeine lejevergadering, mits op dees vergadering minstes 3/4 van de leje aanwezig is. ‘t Besjloet toet wieziging zal mótte waere genaome mèt 2/3 van de oetgebrachde geldige sjtumme. As bliek det dees vergadering gèn besjloet kèn nimme doordet ‘t vereisde aantal leje neet aanwezig is, den wuuërt binne ein maondj ‘n nieje algemeine lejevergadering oetgesjreve, die, óngeach ‘t aanwezige aantal leje, toet wieziging kèn besjloete, mits 3/4 van de aanwezige sjtumgerechtigde leje zich veur de wieziging oetsjpraeke.