Vastelaovesvereiniging "De Windjbuujels" Ruiver

VVDW

Neutje en Muller van Jûnke

Windjbuujels en windjbuulinekes,

Jûnke (alias Prins 2018) haet ós (alias Neutje en Muller), ós ieërste echte opdrach gegaeve veur ‘t nieje jaor. ‘Sjrieëf ouch ‘ns ‘n sjtökske veur ‘t daagbook, zag d’r taege ós. Nao ós ‘ne kieër of zes achter de oere gekrats te höbbe zien veur tóch maar achter de computer gekraope. Regele en buffele wie verkes Willum kènne veur dinke veur good, maar sjrieve zit minder in ós blood. Maar ja dao gaon veur den.

Veur zien as adjudante natuurlik harsjtikke verieërd det Jûnke ós gevraog haet om adjudant te waere. De manier wao-op hae ós gevraog haet, haet nag aardig get sjpanning en tied gekós. Maar allein ’t idee van adjudant waere vónje veur in ein waord geweldig. Dus … höbbe veur ouch – nao hie en dao get te euverlekge – netuurlik allebei volmondig jao gezag. Maar ja … wat den? Nao ‘ne waterval van de PeeKaa, biej de ieërste biejeinkoms, höbbe veur ‘ne aardige indrök gekrege wat van ós verwach waerd en wie geweldig dit jaor waal neet geit waere. Det veur vanaaf toen mèt ‘n bietje razzelende bein door ’t laeve gaon maak daodoor nieks mieër oet. Want wat höbbe veur d’r zin in.

’t Ieërste fieësweekend is eigenlijk al achter de rök en veur höbbe al ‘ne houp sjoeëne reaksies gehuuërd hie-euver. Of dit noe euver de Mansluujzittting, Vrouwluujzitting, LVK opnames of Niejjaorsconcert ging det maak neet oet, euveral waas fieës in ’t Windjbuujelriek, sjoeën om te huuëre. Wat ós veural opveel in alle reaksies van aafgeloupe weekend is det veur ‘n niej kabaret/zang trio d’r biej höbbe in Limburg. Veur kóste neet mieër óm de sjoeën filmkes op Gezichsbook haer. Iets van ’n pötje mèt vet …?

Ouch kómmend weekend is ’t weer volop pries. Veur zien d’r nag neet gans oet wao veur haer gaon en of veur waal durve te gaon. Want det zien natuurlik extra sjpannende momente. Helaas zit veur Jeugdprins Niels I en adjudante Max en Rik en Bacchus Stan IV meèt zien klöp ‘n sjoeën jaor d’r bienao op. Gangk nag maar ‘ne kieër veurop in de polonaise en nim die manne van de Raod van 11 den ouch mei zoeë det die vas kènne oefene veur kommend jaor. Veur zien beniejd wae de nieje Jeugdprins(es) en Bacchus gaon waere. Veur wille häör daorom alvas sukses winse mèt de letste loodjes en op nao ’n sjoeën jaor.

Langzaam gaon veur aafsjloete. Maar neet veur det veur gezach höbbe det geur allemaol mót gaon Prinsraoje. De opbrings kump ten goede aan de Kinjeroptoch. Maar natuurlik haope veur ouch det idderein meiduit aan de Confetti Ummer Challenge (#CUC) dae door de Kinjeroptochkemmissie gesjtart is. Wie sjiek zien al die filmkes. Zelfs ós Burgermooder en de Boerefemilie laote zich neet kènne. Geweldig toch? Det sjmaak nao mieër. Als d’r miense zien die nag tips of vraoge veur ós höbbe den huuëre veur det gaer. Zoeë genog gewazeld. Veur zeen ós.

Neutje en Muller