Vastelaovesvereiniging "De Windjbuujels" Ruiver

VVDW

’n Berich van de Vors

Windjbuujels en windjbuujelinnekes,
Vanaovend is ’t den weer zoë wiejt. De ieërste nieje Jeughoeëgheid waert weer oet ‘ne hood ‘getoverd’. En morge? Morge kump weer ‘ne nieje Bacchus oet. En … euver twieje waeke sjteit alweer de nieje groeëte Hoeëgheid 2018 op de planke . Maar netuurlik höbbe veur ieërs nag de Buutteaovend en de Sjterzitting. Dit zien de letste aktiviteite van ósse huidige Hoeëgheid Prins Joep I en zien adjudante Bas en Ramon. Wat höbbe die jonges ‘n jaor gehad. Same mèt vastelaovendvierend Ruiver is d’r ein geweldige jubileum edisie neergezatte. Op vriedaag 26 jannewarie gaon veur same mèt uch dit trio nog ens flink in ’t zunke zette biej ós eige residensie Ronckenstein. Hie zal Prins Joep I aan ’t eind van de aovend zien deilname biej de Ex Prinse Sociëteit(EPS) gaon inwillige.
Wie ich in ’t begin al zag, vanaovend begint ‘t. Al die kommissies zien weer ein jaor bezig gewaes óm häör taak zoeë good meugelik toet oetveuring te bringe. En wat is det gaaf óm te zeen det der zoëvuuël vriewilligers zien die der veur zörge det de vastelaovend oppe Ruiver blief laeve. Vuuël miense dinke det det allemaol leje zien van de vereiniging of van de raod van ellef, maar ’t siert de vereiniging dét juus vuuël vriejwilligers boete dees vereiniging bepaalde werkzaamhede verrichte. Ich weit ouch wie drök ós eige raod en besjtuur is bezig gewaes mèt alle veurbereidinge op ’t nieje sezoen. En ouch de dames van ós gengig gedeilte zien weer hel aan ’t knutsele om zoëvuuël meugelijk attribute te verkoupe aan de vastelaovendvierder oppe Ruiver en wieët d’r boete. En neet te vergaete ós joekskapelle, ouch zie zörge weer veur ’n lekker vastelaovesjéske, in dét jeske zit in iddere tés waer ‘n nieje muzikale toegave. Zie rippeter ’t ganse jaor door óm ouch mèt dees daag d’r te sjtaon mèt nieje arrangemente. Zoeë zörge zie d’r veur det de Ruiverse en Limburgse meziek gewaarborg blief.
Al mèt al is ’t produkt det vastelaovend geneumd waert weer bienao aaf. Of óm in ós nieje thema te sjpraeke, deze vastelaovend waert wederom “Good Geknip”. Ich wil names ós besjtuur, President, Seriemoniemeister en ós huidige en nieje trio uch eine waanzinnig sjoeëne vastelaovend winse, geniet mèt elkaar en zörg det dae vastelaovend oppe Ruiver noejts verlaore geit. Veur zeen ós sjnel.
Vastelaoves Groete,
Vors
Sjoerd van Leipsig