Vastelaovesvereiniging "De Windjbuujels" Ruiver

VVDW

Initiatief Boerebroelof 2019

’t In sjtandj haje van tradisies – en det geldt ouch veur Vastelaovestradisies – is neet altied gemekkelik en ‘t kós zeker väöl tied en energie. ’t huidige Besjtuur en de leje van Boerebroelof Ruiver-Óffebèk höbbe det jaorelang – ouch bie de grilligheid die de vastelaovend taegewaordig kènt – mèt ’ne volle akku van enthousiasme, energie en vrieje tied gedaon. Dank daoveur!

Echter de sjpraekwaordelikke akku waas mèt alle insjpanninge noe èch laeg geraak. Zoe laeg det d’r – mits nemus angers zich zou inzette – de Boerebroelofstradisie nao 5×11 jaor verlaore zou gaon. 



Vastelaovesvereiniging De Windjbuujels haet in euverlegk mèt Boerebroelof Óffebèk ’t moosstèkske in idder geval veur 2019 opgepak waomei ouch de vereiniging Boerebroelof Ruiver-Óffebèk blief veurtbesjtaon. En ’t moog ouch al bekend gemaak waere det de keuzekemissie witte rouk sinjale haet gesjtuurd. ’n Nie Boerebroelofsgezelsjap veur 2019 is daomei ‘n feit.

Haopelijk lök ’t de kemissie ouch nag óm ’n niej jeugboerebroelof te prissentere. ’t Boerebal (23 fibberwarie) en de Boerebroelof op vastelaovesdinsdig gaon in 2019 in idder geval gewuuën door en veur raekene juus ouch dit kieër op uch kóms en betrokkeheid.