Vastelaovesvereiniging "De Windjbuujels" Ruiver

VVDW

Gèn activiteite door V.V. De Windjbuujels in ’t kómmend vastelaovesseizoen

Windjbuujellinnekes en Windjbuujels,

Zoe net veur de zomervakantie höbbe veur uch – via ózze niejsbreef – ‘ne veuroetblik gegaeve op ‘t kómmende vastelaovesseizoen 2020-2021. Mèt ‘t coronavirus op ózze bagagedrager waerde ós veurbereijinge op ‘t nieje seizoen sjterk behinjerd. D’r waas twiefel in ‘t besjtuur en bie de kemmissies, mer mèt meugelikke versoepelinge vanoet de euverheid in ‘t veuroetzich en ómdet ós vastelaoves-blood ouch kruup wao ‘t neet gaon ken, bleef de haop besjtaon det veur van de vastelaovend zoeas veur det gewend zien ‘n fieës van verbónjeheid kóste make…..desnoeëds in aangepaste vorm. Veur haje ós immers veurgenaome ‘t maximaal meugelikke oet ós activiteite te wille haole.

 

Noe zón twieë maondj later waert ós laeve nag sjteeds beïnvloed door ’t coronavirus. Nao inkele versoepelinge in de vakantieperiode waert d’r intösse weer naogedach euver ‘t verder aantrekke van de teugels. ‘t Virus is weer bezig aan ‘ne opmars ….. veur zien d’r dus nag neet vanaaf.

Veur zien den ouch in de sjtellige euvertuging det ‘t coronavirus ‘ne sjterke invloed geit höbbe op ózze vastelaovend. De huidige 1,5 maeter-maatregel zit nag sjterk verankerd in de regelgaeving en mèt dit veuroetzich is ‘n sjpontane- en óntsjpanne vastelaovend zoe good as ondinkbaar. Vastelaovend is ‘n fieës van same hosse en sjpringe, same zingen, same lache en mekaar lekker same vaspakke …. det alles zit d’r neet in deze kier!

Veur wille daonaeve bie veurkómme det ein van ós activiteite as katalysator geit werke in de verdere versjpreiding van ‘t virus.

 

Dit alles haet óngertösse al geleid toet ‘t aflasse van ós liedjesweekend in oktoeëber.

Helaas blief ‘t dao neet bie, want mèt pien in ós vastelaoveshert – en nao aafsjtumming mèt ós Ruiverse en Óffebekse zustervereniginge, C.V. De Drake oet Beesel en mèt burgemeister Vostermans – höbbe veur helaas mótte besjloete det De Windjbuujels en de Boerebroelof Ruiver – Óffebek in ‘t seizoen 2020-2021 gèn activiteite gaon organisere.

Wie gaer det veur ’t ouch zólle wille, zelfs mèt ‘t in ach nimme van alle richliene en ‘t bedinke van allerlei alternatieve, kènne veur de gezóndjheid van ós vastelaovesvierders neet garandere. Daonaeve is dit ‘n verantjwoordelikheid die veur neet kènne / wille nimme.

Väöl windjkrachte höbbe De Windjbuujels in de afgelaope jaore doorsjtaon, mer de krach van ‘t coronavirus is ouch veur ós ‘n mäötje te groeët.

 

Concreet beteikent dit det d’r in ‘t kómend vastelaovesseizoen gèn activiteite zalle waere georganiseerd, en det d’r gèn nieje hoeëgheje kómme.

Prins Sjoerd II mèt adjudante Tom & Joppe, Jeugdprinses Lissy I mèt adjudante Sien & Janne, de Boeregezelsjappe mèt Boerebroedspaar Ruud & Linda en häör getuge Erwin & Kim en Roy & Dana en Jeugdboerebroedspaar Guusje & Pepijn mèt häör getuge Bibi & Cas blieve dit jaor aan en volgend jaor zalle zie häör huidige seizoen op ‘n Windjbuujels waardige wieze aafrónje.

 

‘t Genaome besjloet velt ós zjwaor, mer raekening hajend mèt de huidige veuroetzichte en de benuuedigde veurbereijingstieje van de diverse activiteite, res ós noe gèn angere keus.

Ouch zónger det de Windjbuujels häör programma dreije, zal d’r ongetwiefeld ‘gewuuen’ – en passend binne de den geldende regelgaeving – vastelaovend gevierd gaon waere in 2021. ‘t Zal angere d’r neet van weerhaje óm sjpontaan activiteite te gaon organisere. Wao meugelik sjtaon de Windjbuujels klaor óm hiejin mei te dinke.

 

Dit jaor blieve ós kostuums dus in de kas en de sjteke in ’t kóffer.

Veur noe: Blief veural gezóndj en haopelik treffe veur ós ’t dao-op volgend seizoen weer tiedes vastelaovend 2021-2022. Veur höbbe d’r noe al weer zin in!

Mèt vastelaovesgroete,

Names ’t besjtuur van V.V. De Windjbuujels en Boerebroelof Ruiver – Offebek.