Vastelaovesvereiniging "De Windjbuujels" Ruiver

VVDW

Dank aan alle vastelaovesvierders en vriewilligers

Aan de veuraovend van ‘n niej vastelaovessezoen wil ich uch nag éfkes meinimme nao alle miense die al ‘ne lange tied bezig zien óm ouch deze vastelaovend te laote sjlage. Väöl vriejwilligers zien jaor in jaor oet – dök zelfs al veur de zomer – bezig om alle aktiviteite van klein toet groeët veur peuter tot senior te organisere. Dink beveurbeeld aan Windjbuujels’ Jeug, de Joekskemmissie maar ouch al ós zustervereiniginge. Wat veur allemaol oppe Ruiver doon is uniek, speciaal maar veural sjpontaan. Al die luuj wil ich alvas bedanke veur häöre geweldige inzet. Allein zoeë behaje veur dae sjoeëne vastelaovend veur de toekóms.

Nag ’n paar daag en de ieërste hoeëghede gaon häör identiteit priesgaeve. De nieje Prins(es) bie Windjbuujels ‘Jeug sjteit al daag te sjpringe óm zich kómmende vriedig te prissetere, maar ouch de Raod van Ellef en de kemmissieleje kènne eigelik neet wachte óm de vastelaovend te laote beginne. Euver ’t Jeugprinsebal gesjpraoke. Wis geur det de knommelkemissie van de Jeug al jaore ’n sjoeën dekor maak veur ’t Jeugprinsebal. Gehieël in thema kèn de nieje Jeugprins(es) zich door de inzet van dees kemissie prissetere in ’n prachtige entourage.

Op zaoterdaag geit ózze nieje Bacchus oetkómme en dét ouch nag ens veur ‘n Bacchusjubileumjaor. 21 Bacchusse ginge ‘m namelik al veur. Zét ‘m op en väöl luuj kómme zeker nao dich kiëke. Wat gerös gezag moog waere is det de Bacchuskemissie deze Nach van Bacchus (zoe wie de aovend van ’t oetkómme waert geneump) de letste jaore ech vet haet getransformeerd nao ’ne mega fieësaovend veur de juuste doelgroep. Chapeau daoveur!

Op vriedig 1 fibberwarie  sjteit de Buuteaovend gepland. Op zaoterdig 2 fibberwarie is de Sjterzitting. En jao ich wil uch verklappe det de eige Ruiverse inbring weer gedege truuk is. ‘n Niej Ruivers keteerke sjteit veur uch op de planke. En det waert lache. Wis geur trouwes det de joekskemissie vaak al twieje jaor veurroet ’t programma maak veur de Sjterzitting en de Buuteaovend omdet angers artieste neet mieër beschikbaar zien. Zo’n programma is zeker ’n leuke maar ouch tiedsintensieve klus waobie väöl kreativiteit en durf belangrijk zien. Knap det zie det idder jaor tóch veurelkaar boekse.
Bös se al jaore neet mieër nao de zitting gewaes? Of waas se überhaupt nag noeijts op dees aovende? Den is ’t zeker dit jaor de meuijte waert. D’r zien nag kaarte. Besjtellen kèn hieël gemekkelik via www.windjbuujels.nl (ónger etickets).
De Sjterzitting is euveriges ouch de aktiviteit wao ózze huidige hoeëgheid Prins Joep II mèt zien adjudante Roy en Twan häöre aafsjiedstoernee gaon inzette want op 10 februari geit ’t den ech eindigge veur ózze hoeëgheid Prins Joep II. Hae zal den in de residensie kefee Ronckenstein zien Prinsesjtaek aafnimme en dae van de EPS opzette. Vanaaf 14:30 oer ziet geur dae daag allemaol welkom.

Op zaoterdaag 16 februari waere de zenuwe in de prullebak gegoeid en waert d’r plaats gemaak veur euforie. De pèkskes kènne eindelik oet de sjtofkas gehaold waere want de nieje hoeëgheid zal den in de Sjakel oetkómme. ’t Toekomstige trio is d’r hielemaol klaor veur (höb ich van huuëre zegge). Net wie anger jaore waert de bühne en zaal weer sjiek versierd. Eind vurrig jaor is de dekorkemissie veur ’t Prinsebal al begós mèt bouwe, tummere en sjildere. ’t Belaof wederom ’n geweldig dekor te waere. Ze höbbe weer ens good oetgepak die manne van de dekorkemisse. Sjiek det det kèn.

Messjiens dink geur noe as geur dit laes, is dae Vors noe allein maar reklame aan ’t make. Gedeiltelik waor. Ich wil uch dudelik make det d’r väöl Windjbuujels en Windjbuujelinnekes nuuëdig zien óm de vastelaovend te blieve viere in ós gemeinte. Al die aktiviteite sjtelle nieks veur zónger uch. Al die vriejwilligers doon det zoedet geur ‘ne leuke middig, aovend en veural ‘ne sjoeëne vastelaovend ként höbbe. Laot uch dus huuëre en haaj ’t geveul van vastelaovend same laevendig.

Toet sjleot zégk ich taege iddere nieje hoeëgheid, geniet van wat geit kómme. Vastelaovend is ‘n fieës was se in dien eige dörp kèns viere en geur gaot dét op ‘n hieële speciale manier meimake.

Aan al die vriejwilligers zégk ich noe nag ‘ne kieër bedank. Veur gaon ós zeen met die daag. Zégk noe zelf “Det klink good!”

De hertelikke vastelaovesgroete,

Vors, Sjoerd van Leipsig