Vastelaovesvereiniging "De Windjbuujels" Ruiver

VVDW

Aaftelle door Prins 2018

Leef Windjbuujels en Windjbuujelinnekes,

Nag maar ’n paar daag en den is ’t zoeë wieët. Eindelik kènne veur same vastelaovend gaon viere as niej trio. Mien adjudante (noe nag bekend ónger de name Muller en Neutje) sjtaon net as ich te trappele van ongeduld en telle bienao de minute aaf nao zaoterdigaovend. Veur höbbe d’r zin in, maar ’t begint ouch sjteeds moeilikker te waere óm de zenuwe onzichbaar te haje. In mien omgaeving zien miense ouch sjteeds mieër bezig mèt prinsraoje. Ich haop det nemus det kiepevel op mien erm zuut as emus ’t euver ‘de nieje’ haet. Sjtiekem bön ich ouch waal beniejd nao de reaksies van diezelfde miense en ’t leefste zou ich ’t ze noe al zegke.

Dees waek waas ’t toch al lastig óm de aandach d’r nag biej te haje op mien werk. En ich huuër van Neutje en Muller dezelfde geluide. Det is, zeker met die beroepe van die twieje, toch waal belangriek det die bie de les blieve.
Ich betrap mich d’r toch geregeld op det ich mèt mien gedachte aafdwaal en den mót ich good op mien telle passe det de miense óm mich haer nieks in de gate höbbe. D’r zien d’r namelik ’n paar bie, die hove nieks te laote bezinke, die sjakele geliek en zitte den häör geld op mich in. Maar veur de Kinjeroptoch is ’t baeter det ze mieërdere kandidate gaon raoje dus ich probeer ze nag effe op aafsjtandj te haje.

Sjoeën ouch óm te zeen det de Confetti Ummer Challenge zoeë good geit. Volges mich haet idderein de confetti al in hoes gehad. Ich höb met väöl plezeer nao al die filmkes gekeke. Idderein haet d’r toch weer get speciaals van gemaak. Super! En ouch veur höbbe ós sjnippers biegedrage en mèt väöl plezeer ’n lading confetti euver Rob haer gegoejd.

Prefisiat aan de nieje Hoeëghede Prinses Nuala I met adjudante Eva en Fleur. En natuurlik ouch dieke felisitaties aan Bacchus Yves I en zien klöp Bacchante. Nag effe en den kènne veur same gaon fieëste. Taeves ouch väöl sukses aan Hoeëgheid Prins Joep I dae opgenaome geit waere in de Eks Prinse Sociëteit morge. Ich dink det die uch zeker werm zalle gaon verwelkome. Net wie adjudante Bas en Ramon ’n fijn welkom gaon vinje in de Aad Adjudante Delegasie.

Aafgeloupe weekend höbbe veur alweer ’n paar sjoeën aktiviteite gehad óm in de sjtumming te kómme. ‘ne Buutteaovend, ’n Sjterzitting, ’n Kinjerzitting en de recepsie van Bacchus Yves I. Sorry Yves, det veur dao nag neet mèt sjteek op zien gewaes, maar det prinselik hendje en drenkske krieg se nag van mich en den zalle veur ’ns prooste op de vastelaovend.

Veur zeen ós zaoterdig en gaon d’r ’n geweldig fieës van make!
Jûnke, Muller en Neutje zien d’r klaor veur.

Toet sjnel,

Windjbuujelprins 2018